O Monbus Obradoiro recupera a boa senda
O Monbus Obradoiro sumou a terceira vitoria da tempada tras derrotar ao Delteco GBC por 88 a 82 no Multiusos Fontes do Sar. A base de entrega, o conxunto santiagués foi facéndose co control do xogo e acabou conseguindo un importante triunfo ante o seu público.
Comezaron mellor o visitantes pero pronto se equilibraron as forzas. Baixo a dirección de Pepe Pozas, o Monbus Obradoiro prodigouse en ataque para chegar a poñerse por diante, aínda que todo quedou igualado ao final do primeiros dez minutos (17-17).
No segundo cuarto, o conxunto guipuscoano atopou o camiño cun acertado Miquel Salvó que impulsou aos seus no marcador. Apareceu entón Maxime de Zeeuw para liderar a resistencia e xunto á inspiración de Kyle Singler mantiveron as distancias (40-42).
Tras o descanso, o Monbus Obradoiro sacou a relucir o seu repertorio ofensivo con Andreas Obst como o seu maior referente. O aleiro alemán, que acabaría como máximo anotador local no partido, liderou a produción atacante do terceiro cuarto con 12 puntos que serviron aos de Moncho Fernández para poñer terra polo medio no marcador (70-62).
Co resultado a favor, o Monbus Obradoiro tivo o partido máis controlado a pesar dos intentos de Garett Nevels por reflotar ao seu equipo. Llovet e Brodziansky decidiron o encontro con dúas accións de mérito nun axustado final que os santiagueses souberon xestionar mellor para levar a vitoria.